Permanent restriksjonsområde i luftrommet over Shell sitt prosessanlegg på Nyhamna

Restriksjonsområdet vart opphaveleg oppretta i 2007 ved forskrift 12. oktober 2007 nr. 1150 om etablering av permanent restriksjonsområde over prosessanlegget på Nyhamna/Aukra, Aukra kommune, Møre og Romsdal. Den nye forskrifta opphevar og erstattar forskrifta frå 2007.

Faklar for å brenne av gass i prosessystema kan utgjere ein fare for lufttrafikk like ved terminalen. Luftfartøy som kjem innanfor det planlagde restriksjonsområdet kan også utgjere ein alvorleg tryggingsrisiko ved at det kan representere ein tennkilde for terminalen.

Bakgrunnen for den nye forskrifta er at dagens restriksjonsområde omfattar ikkje det behovet A/S Norske Shell har for å vareta tryggleiken over prosessanlegget. Fleire av bygningane på prosessanlegget og dessutan delar av gjerdetraséen som sperrar av området for utanforståande, ligg utanfor restriksjonsområdet. Dette medførte behov for å forandre utstrekninga av området.

Følgjande restriksjonar gjeld:
All flyging i restriksjonsområdet er forbydd, med mindre særskilt løyve er gitt av Shell eller Luftfartstilsynet. Kontaktpunkt for søknad om særskilt løyve skal kome fram av AIP Noreg. Flyforbodet gjeld all luftfart inkludert flyging med ubemanna luftfartøy og modellfly. Flyforbodet gjeld ikkje flyging i samband med militær-, politi-, ambulanse-, brann-, søke-og redningsoppdrag. Flygingar nemnt i førre ledd skal likevel koordinerast med Shell. Flyforbodet gjeld ikkje luftfartøy som overflyr området i 3000 fot AMSL. Flyforbodet gjeld heller ikkje flygingar utførte av eller på vegner av Shell eller flygingar etter Avtalen om det opne luftrommet.

Nærare informasjon om restriksjonsområdet kan finnast på Lovdata:

Forskrift om skiping av permanent restriksjonsområde i luftrommet over Shells prosessanlegg på Nyhamna – Lovdata

Forskrifta tredde i kraft 4. juli 2024.